Agjencia e lajmeve Kosovanews kosovanews.info
Rivaliteti në mes të Mimoza Kusari-Lilës dhe Pal Lekajt, i nisur 4 vjet më parë, po vazhdon edhe gjatë këtyre ditëve, bile tash edhe më i ashpër, duke pasur parasysh faktin se të dy këta janë futur në garën e ngushtë të balotazhit që do të zhvillohet me 1 dhjetor.
Akuzat e kundërakuzat po shfaqen në çdo segment jo vetëm politik, por edhe në sferat më të thjeshta të jetës. Përmes një komunikate dërguar mediave, zyra për informim e AKR-së e ka akuzuar qeverinë lokale, konkretisht drejtorinë komunale të Kulturës dhe Sportit për ndikim politik dhe pamundësim që AKR-ja të zhvillojë aktivitetet e veta në ambientet publike.
“Zyra për informim e AKR-së në Gjakovë njofton qytetarët e Komunës së Gjakovës se për nder të ditës së Flamurit, me 28 nëntor, ka planifikuar që të organizojë një koncert madhështor me artistë dhe këngëtarë nga Shkodra dhe Gjakova, duke kthyer në komunën e Gjakovës traditën dhe kultivimin e mirëfilltë të vlerave kulturore që paraqesin këto dy qytete për mbarë shqiptarinë. Fatkeqësisht, realizimi i kësaj ideje po pengohet nga komuna e Gjakovës dhe qeverisja në largim, e cila menjëherë pasi që është dërguar shkresa zyrtare nga AKR-ja për shfrytëzimin e palestrës sportive ‘Shani Nushi’, drejtori për kulturë rini dhe sport, Anton Shala, ka kontaktuar me sektorin e sporteve, duke ju thënë se me datën 28 palestra sportive do të shfrytëzohet nga AAK-ja.
Me të marrë informacionin ne kemi hulumtuar në librin e protokolit në komunën e Gjakovës, ku nga data 1. 11. 2013 e deri me ditën e sotme nuk është regjistruar as një kërkesë zyrtare nga AAK-ja”, thuhet në reagimin që AKR-ja u ka dërguar medieve, ndërsa nuk i ka kursyer as akuzat nda kësaj drejtorie dhe qeverisë lokale. “AKR është e vendosur deri në fund që ta organizojë këtë aktivitet, pavarësisht pengesave që kjo qeveri po synon të na bëjë. Dihet se disa herë e njëjta qeveri dhe të njëjtit drejtor kanë dëshmuar se janë kundër kulturës së mirëfilltë” vazhdon komunikata.
E për këtë deklaratë të AKR-së, të enjten ka reaguar edhe Komuna e Gjakovës, konkretisht nënkryetari i saj Agim Koci. Në një konferencë për media, Koci e ka akuzuar për shpifje AKR-në, ndërsa e ka dhënë versionin e tij për situatën e krijuar. “Ne kemi marrë një vërejtje nga Komisioni Evropian, i cili ka investuar në renovimin e palestrës, që deri në pranim – dorëzimin e punimeve në muajin prill, në këtë sallë të mos zhvillohet asnjë aktivitet politik e kulturor. Ne nuk guxojmë të veprojnë kundër kërkesave të tilla, sepse si komunë kemi nevojë për donator siç është KE-ja dhe nuk mund t’i humbim ata. Deklarimet e AKR-së janë shpifje, sepse drejtoria e kulturës ua ka mundësuar atyre që aktivitetin e vet ta zhvillojnë në sallën solemne të Pallatit të Kulturës ‘Asim Vokshi’, në pamundësi që ata ta mbajnë në palestrën e sporteve.
Gjithashtu është e pa vërtetë deklarata e tyre se me 28 nëntor AAK-ja do të mbajë aktivitet në palestër, sepse kërkesa e KE-së vlen si për AKR-në ashtu edhe për AAK-në”, ka thënë Koci, ndërsa ka garantuar se deri në muajin prill, asnjë aktivitet nuk do të zhvillohet në palestrën e sporteve. Çështja e palestrës së sporteve është përmendur edhe në debatin që Kusari-Lila e Lekaj e kanë pasur në njërin prej televizioneve kosovare të mërkurën në mbrëmje, ndërsa edhe shumë deklarata tjera të këtij debati kanë qenë cak i reagimit të nënkryetarit Koci.
Ai madje e ka akuzuar kandidaten Kusari-Lila se ka ndikuar tek lojtarët e KF Vëllaznimi që ta bojkotojnë një ndeshje futbollistike që ishte paraparë të zhvillohej të mërkurën, me arsyetimin se klubi u ka atyre borxh. “Në kontratat që klubi i ka me lojtarët decidivisht thuhet se afati i fundit për pagesën e pagave është data 15 dhe ne pikërisht më 15 nëntor, do ta kryejmë këtë obligim ndaj lojtarëve. Jemi të bindur se edhe në këtë rast politika, konkretisht zonja Kusari-Lila i ka futur duart, duke ndikuar tek lojtarët që ta bojkotojnë takimin”, ka thënë Koci, i cili në të njëherësh është edhe kryetar i klubit “Vëllaznimi.
Nga ana tjetër, prezent në këtë konferencë, drejtori i ndërmarrjes Çabrati, Avdullah Babalija ka mohuar se kjo kompani nuk i ka paguar pagat e punëtorëve tash e 5 muaj, ashtu siç ka deklaruar në debatin e së merkurës mbrëma Kusari-Lila. Ai ka shtuar se kompania nuk e ka asnjë cent borxh ndaj punëtorëve dhe ky ka qenë edhe synimi kryesor i tij si drejtor që pagat të jepen me rregull çdo muaj. “Qysh në ditën e parë kur kam ardhur në këtë post para 3 vjetësh u kam premtuar punëtorëve se kompania nuk do t’u mbetet borxh asnjë cent dhe këtë premtim e kam mbajtur deri në këtë ditë. Për këtë mund t’i pyesni të gjithë punëtorët me radhë”, ka thënë Babalija.