Agjencia e lajmeve Kosovanews kosovanews.info
Buxheti i vitit 2014 është në linjë të plotë me objektivat e Qeverisë për rritje të qëndrueshme ekonomike dhe stabilitet makrofiskal, si dhe është në harmoni të plotë me FMN-në. Ky buxhet, gjithashtu siguron rritje ekonomike prej 4 për qind dhe përmirësim të mirëqenies dhe standardit të qytetarëve të vendit.
Kështu pohoi ministri i Financave, Besim Beqaj, në Komisionin për Buxhet dhe Financa ku u shqyrtua në parim Projektligji për Buxhetin e Republikës së Kosovës për vitin 2014. Beqaj tha se në vitin 2014 rritja ekonomike pritet të jetë 4.1 për qind, ndërsa në tri vitet tjera në vijim kjo rritje do të jetë 4.6 për qind.
“Ne presim që në vitin 2014 dhe në vitet në vijim, ekonomia e Kosovës të vazhdojë me ritmet e saja pozitive të rritjes. Presim që në vitin 2013 norma e rritjes të jenë ndër më të lartat në rajon. Projeksionet për 2014 janë nga 4.1 për qind edhe mesatarja për tri vitet e ardhshme është 4.6 për qind, duke u bazuar në projeksionet tona për rritje të investimeve, eksporteve dhe konsumit. Investimet private si një komponentë shumë e rëndësishme e rritjes ekonomike, pritet që gjatë tri viteve të ardhshme të rriten në nominalisht një normë mesatare rreth 10 për qind. Eksportet totale në vitin 2014 pritet të kenë një rritje prej 7 për qind. Kjo normë relativisht e lartë e pritjeve për rritjen e eksportit së bashku me një normë më të ulët të rritjes së importeve që është 4 për qind, pritet që të fillon përmirësimin e bilancit negativ tregtar, që vazhdon të jetë i lartë dhe paraqet sfidë për ekonominë e vendit tonë“, tha ai.
Beqaj, po ashtu pohoi se ecuria e çmimeve në vend do të varet edhe nga ecuria në tregun global dhe se projeksionet e Qeverisë, për vitin e ardhshëm tregojnë ngritje modeste të çmimeve prej rreth 1.5 për qind. Ndërsa, pohon se buxheti i vitit 2014 për pagat dhe mëditjet do të jetë më i lartë, gjë e cila do të reflektojë me zotimin e qeverisë për rritje pagash.
“Buxheti për paga dhe mëditje pritet të ketë një rritje të konsiderueshme nga 435 milionë euro në vitin 2013 në 484 milionë euro në vitin 2014. Ky buxhet reflekton zotimin e qeverisë për rritje të pagave të gjithë shërbyesve civil, duke marrë parasysh performancën dhe efektivitetin e punës së tyre”, tha ai.
Ndërsa Naser Osmani, anëtar i këtij komisioni nga radhët e LDK-së, kërkoi që të ashpërsohen kriteret dhe të mos lejohen kryetarët e komunave të investojnë në kohë fushate jashtë procedurave të parapara për investime kapitale.
“Ajo që është vërejt në kohen e fundit sidomos në kohen e fushatës zgjedhore, ka të bëjë me investimet e disa kryetarëve të komunës jashtë procedurave, investime kapitale duke kërkuar votën dhe duke dhënë brenda natës duke bërë investime. Te neni 10, paragrafi 3 është mirë i shkruar që 10 për qind në nëntor dhe 5 për qind në dhjetor, të mos ketë me tepër zotime. Këtu duhet ashpërsuar këtë se praktikat tona tregojnë diçka tjetër. Duhet ashpërsuar këtë nen dhe këtë paragraf, që të mos i lejohet cilit do kryetar dhe cilës do parti, që të abuzoj me mjetet publike për qëllime të fushatës”, tha Osmani.
Ndryshe, në këtë propozim buxhet për vitin 2014 të hyrat e përgjithshme buxhetore, planifikohen të jenë në nivel prej 1 miliard e 458 milionë euro, apo një rritje prej rreth 2.5 për qind, krahasuar me vitin 2013. Në kuadër të të hyrave totale, të hyrat nga tatimet e brendshme dhe ato doganore, priten të rritet rreth 7 për qind, ndërsa vetëm të hyrat e brendshme, pritet të rriten në rreth 22 për qind.
Rritje planifikohet të ketë dhe tek të hyrat tjera buxhetore, duke përfshirë të hyrat jo tatimore 8.5 për qind, të hyrat vetanake të komunave 6.7 për qind. Ndërsa, është planifikuar rënie e të hyrave vetanake të nivelit qendror, diku rreth 31 për qind.
Totali i shpenzimeve për vitin 2014, pritet të jetë në nivel prej 1 miliard e 590 milion euro, që paraqet një rritje të lehtë krahasuar me vitin 2013. Ndërsa, shpenzimet kapitale, priten të jenë në vlerë prej 531 milion euro, që janë më të lartat në rajon edhe me buxhetin e planifikuar, parashihet vazhdimi i investimeve në të gjitha fushat me prioritet dhe investimet në infrastrukturë rrugore.
Edhe ministritë, sipas këtij buxheti do të kenë rritje të buxhetit. Ministria e Bujqesisë do të ketë rritje në buxhetin e vitit 2014 për rreth 4 milionë euro më shumë se sa në vitin 2013, Ministria e Shendetsisë ka një rritje prej 7.5 milionë, MASHT-i ka një rritje prej 5 milionë euro, Ministia e Punës ka një rritje prej 23 milionë euro. Ministia e Punëve të Brendshme ka rritje prej 7 milionë euro, FSK, rritje prej 3 milionë euro, Këshilli Gjyqësor i Kosovës do të ketë rritje të buxhetit prej 1 milion euro dhe Ministria e Diasporës rritje prej 2.2 milionë euro.