Agjencia e lajmeve Kosovanews kosovanews.info
Autostrada Vërmicë – Prishtinë, e njohur si autostrada e kombit, do të përurohet muajin e ardhshëm, më 25 ose 26 nëntor. Kështu tha kryeministri Hashim Thaçi, i cili inspektoi sot punimet në seksionin e nëntë të saj në Besi. Ai theksoi se ky është projekt madhështor i Kosovës evropiane, dhe së shpejti paralajmëroi edhe nisjen e autostradës drejt Hanit të Elezit.
Punimet në autostradën e kombit janë në fazën përfundimtare. Ky projekt madhor i financuar nga qeveria e Kosovës pritet të jetë gati deri në fund të muajit nëntor. Kryeministri i Kosovës Hashim Thaçi, bashkë me ministrin e infrastrukturës inspektoi punimet në seksionin e nëntë, dhe në mënyrë simbolike, filloi ngjyrosjen e vijave e bardha ndarëse të saj. Ai theksoi se ky projekt e ndan vendin tonë nga epoka e moszhvillimit.
“Ky është projekti i Kosovës evropiane dhe vijat që bëmë sot këtu, janë vijat që ndajnë epokën e moszhvillimit më atë të modernizimit, me atë të Kosovës evropiane që po e ndërtojmë. Prandaj uroj të gjithë qytetarët e Republikës së Kosovës për këtë projekt madhështor, më modernin në rajon”., tha ai.
Kryeministri Thaçi tha se ky është projekt i shtetit të Kosovës, i qytetarëve të saj dhe jo i partive politike, dhe se i jep kuptim vizionit për Kosovën evropiane.
“Tanimë janë bërë të gjitha përgatitjet për fazën përfundimtare, kanë mbetur vetëm aspektet teknike deri te përurimi që do të jetë më datën 25 ose 26 nëntor të këtij viti. Pra po përmbyllim autostradës prej Vërmice deri këtu në Besi, për të vazhduar menjëherë autostradën tjetër në drejtim të Shkupit”, tha ai.
Drejtori i projektit Chris Jennions, tha se autostrada po përfundon sipas planit.
“Ne po i kryejmë punët përfundimtare, janë edhe disa javë dhe ne do jemi në gjendje pastaj ta dorëzojmë projektin ashtu sic jemi marrë vesh, para përfundimit të vitit”, tha ai.
Ndërtimi i autostradës kishte filluar në prill të vitit 2010. Kostoja e saj është rreth 700 milionë euro.