Agjencia e lajmeve Kosovanews kosovanews.info
Nëse kriza politike vazhdon të manifestohet edhe në vitin 2016, ajo do të dëmtojë në mënyrë të pariparueshme interesat kosovare me prioritet për vitin e ardhshëm.
Të gjitha këto lidhen me përqendrimin e të gjitha kapaciteteve politike dhe ekonomike në përmbushjen e marrëveshjes për Stabilizim dhe Asociim që Kosovës i hap edhe zyrtarisht perspektivën evropiane.
Kjo u bë e ditur në një konferencë për medie të organizuar nga Oda Ekonomike e Kosovës në bashkëpunim me SPARK nga Holanda dega në Kosovë për të lansuar aktivitetin e përbashkët kushtuar informimit të komunitetit të biznesit lidhur me përparësitë dhe sfidat me të cilat do të ballafaqohet me rastin e fillimit të implementimit të MSA me Unionin Evropian.
Në këtë konferencë u tha se Kosova nuk e ka luksin që të rrezikojë përmbushjen e kësaj marrëveshje dhe vendit i duhet konsensus politik që do të sigurojë që marrëveshja gëzon prioritet pa marrë parasysh proceset e brendshme politike.
Kryetari i OEK-ut, Safet Gërxhaliu tha se kjo Odë pretendon t’i mbajë disa aktivite te me komunitetin e biznesit për sfidat dhe përparësitë e marrëveshjes së MSA-së.
Takimet pritet të mbahen më 18 dhjetor në Prizren, më 28 dhjetor në Mitrovicë dhe më 29 dhjetor në Prishtinë. Gërxhaliu tha se për këto aktivitete të OEK-ut dhe për ekonominë në përgjithësi, politika është duke e stërngarkuar agjendën ditore dhe sipas tij edhe vet komuniteti i biznesit është lodhur me veprimet e skenës politike në vend. Ai tha se për OEK prioritet i prioriteteve duhet të jetë zhvillimi ekonomik.
Gërxhaliu: Kaosi politik është duke dëmtuar Kosovën në zhvillimin ekonomik
“Jemi dëshmitarë të asaj që kaosi politik i krijuar kohëve të fundit është duke dëmtuar Kosovën në dimensione të ndryshme, mirëpo dimensioni më shqetësues është definitivisht dimensioni integrues dhe e tëra kjo do të ndikojë jo vetëm për pranimin në UNSESCO, jo vetën në liberaliz im, mirëpo do të ndikojë edhe në prolongimin e fillimit të implementimit zbatimit të MSA-së. Në këtë drejtim po e shihini se për hire të tekeve dhe të interesave politike po dëmtohet komuniteti i biznesit dhe kur dëmtohet ky komunitet drejtpërdrejt ndikon në jetën dhe standardin e qytetarëve”, tha Gërxhaliu.
Ai tha se kanë menduar se në vitin 2015 do të rikuperohen pasojat e vitit 2014, por brenga e tyre mbetet për 2016 në qoftë se vazhdohet me këtë avaz dhe me këtë tempo.
Kurse, përfaqësuesi i SPARK nga Holanda dega në Kosovë Amir Kosumi tha se bizneset duhet të jenë më mirë të informuara për mundësitë e përfitimit dhe lehtësirat që do t’i kenë nga nënshkrimi i MSA-së. Dhe për këtë SPARK në bashkëpunim me OEK do të realizojnë projektin nëpër disa komuna për njoftimin e bizneseve nga ekspert të lëmisë të cilët kanë pasur ndikim të madh në draftimin e MSA-së.
Kosumi: T’i njoftojmë bizneset se cilat janë përfitimet reale nga MSA
“Kemi identifikuar edhe një mungesë të bizneseve me informatat se çka përfitojnë bizneset nga nënshkrimi marrëveshjes së MSA-së, në bashkëpunim me odën ekonomike… ekspertët e lamisë të cilët më të vërtet kanë pasur ndikim të madh në draftimin e MSA-së për vite të tëra t’i njoftojmë edhe bizneset se cilat janë përfitimet reale, cilat janë lehtësirat të cilat bizneset do të përfitojnë nga nënshkrimi i kësaj marrëveshje”, tha Kosumi.
Kompanitë kosovare me MSA-në do të kenë qasje më të lehtë për të hapur dhe zhvilluar biznes në vendet e Bashkimit Evropian dhe e njëta gjë do të vlejë edhe për kompanitë që vijnë nga vendet e BE-së.