Shenjat që na jep trupi kur i mungojnë vitaminat

Kur diçka nuk shkon më trupin tonë, ai gjithmonë na jep sinjale. Mjafton që të dimë t’i lexojmë. Menuja ushqimore, e cila në një pjesë të madhe të saj përbëhet nga ushqime të përpunuara, mund të mos ketë vitaminat e nevojshme, për të cilat ka nevojë organizmi.

Ja disa prej shenjave që na jep trupi kur nuk merr sasinë e duhur të vitaminave.

Çarje në cepat e buzëve  – Janë tregues i mungesës së hekurit, zinkut dhe vitaminave të grupit B: B3, B2 dhe B12.  U ndodh më shpesh vegjetarianëve apo personave që mbajnë dietë të varfër me këto vitamina.

Si rregullohet? Duke ngrënë më shumë salmon, ton, vezë, midhje, domate të thara, kikirikë dhe thjerrëza. Asimilimi i hekurit nga organizmi rritet nga vitamina C, e cila lufton edhe infeksionet. Prandaj ushqimet e mësipërme duhen kombinuar me perime si brokoli, speci i kuq dhe lulelakra.

Njolla të kuqe në lëkurë dhe rënie e flokëve –  Janë tregues i mungesës së vitaminës B7.

Si rregullohet? Duke konsumuar vezë të gatuara, salmon, avokado, kërpudha, lulelakër, sojë, arra, fruta pylli dhe banane.

Puçrra të kuqe të ngjashme me aknet që dalin kryesisht në faqe, krahë, kofshë dhe fundshpinë –  Janë tregues i mungesës së acideve yndyrore dhe vitaminave A dhe D.

Si rregullohet? Shmangni yndyrnat e pangopura dhe përdorni ato të shëndetshmet, që i gjeni te salmoni, sardelet, arrat, bajamet dhe farat kia. Vitamina A mund të gjendet në perime si karota, patatet e ëmbla dhe specat e kuq. Për rregullimin e niveleve të vitaminës D, mjekët rekomandojnë suplementet farmaceutike.

Dridhje, pickime dhe mpirje e një gjymtyre – Është tregues i mungesës së vitaminave B9, B6 dhe B12. Problemi ka të bëjë me nervat periferike dhe zakonisht simptomat përfshijnë ankth, depresion, anemi, lodhje dhe çrregullime hormonale.

Si rregullohet? Konsumi i ushqimeve si spinaqi, shpargujt, fasulet e të gjitha llojeve, vezët, frutat e detit dhe mishi i pulës mund të ofrojnë të gjitha vitaminat që mungojnë.

Dhimbje muskujsh dhe therje në gishta dhe pjesën e pasme të këmbëve –  Janë tregues i mungesës së kalciumit dhe potasit. Nëse kjo ndodh shpesh do të thotë se ose nuk i merrni këta elementë, ose i humbisni shpejt nëpërmjet djersës.

Si rregullohet? Konsumoni më shumë banane, bajame, lajthi, qershi, mollë, rrush, brokoli, spinaq etj.