Sot lajm i madh për Kosovën, Qeveria e bindur për heqjen e vizave

Komisioni Evropian pritet që sot pasdite të vendos për apo kundër propozimit legjislativ për liberalizimin e vizave për Kosovën. Izolimi i kosovarëve për në Evropë do t’i jepet fundi pas vendimit të sotëm nga KE-ja, kjo është konfirmuar edhe nga Qeveria e Republikës.
Në agjendën e sotme të KE-së Kosova figuron në pikën e 14 dhe 15 ku edhe pritet që të deklarohet nëse janë përmbushur kushtet.
Ministria e Integrimeve Evropiane është shprehur e bindur se rekomandimi i vizave për Kosovën mund të ndodhë sot (e mërkurë), ashtu siç ishte raportuar në mediet ndërkombëtare dhe ato vendore.
Ministria e udhëhequr nga Bekim Çollaku, në një përgjigje për “Indeksonline”, ka konfirmuar se gjatë këtij viti qytetarët e Kosovës do të lëvizin pa viza në zonën “Schengen”. Megjithatë, sipas tyre, vendimin përfundimtar do ta japin institucioneve përgjegjëse të BE-së.
“Në fakt mediat vendore dhe ato ndërkombëtare kanë paralajmëruar se Komisioni Evropian brenda pak ditësh do të rekomandojë liberalizimin e vizave për Kosovën. Dhe në bazë të komunikimeve që kemi me Komisionin Evropian besojmë se nuk do të jetë aspak befasi që kjo të ndodhë. Për më tepër ka pak rëndësi se kur do të bëhet rekomandimi, me rëndësi është që gjatë këtij viti qytetarët e Republikës së Kosovës do të lëvizin pa viza në shtetet e zonës Schengen, ndërsa data e saktë se kur do të ndodh kjo varet nga dinamika e brendshme e vendimmarrjes në institucionet e BE-së”, thuhet në përgjigjen e MIE-së, respektivisht zyrtares për Media, Blerta Aliut.
Nga ana tjetër, zëdhënësja e Komisionit Evropian, Mina Andrevas ka thënë se kolegjiumi i komisionarëve do të diskutojë gjendjen e fundit të Kosovës lidhur me plotësimin e standardeve për liberalizimin e vizave, për të parë nëse duhet apo nuk duhet bërë propozimin legjislativ për liberalizimin e vizave për Kosovën.
“Vendimi është i pashmangshëm nëse të gjitha standardet janë plotësuar”, ka thënë ajo.
Ndryshe, para disa ditëve, prestigjiozja “Reutres” ka raportuar se të mërkurën Komisioni Evropian pritet që të marr vendim për futjen e Kosovës në procesin e liberalizimit të vizave.