Thaçi: Do ta menaxhojmë suksesshëm incidentin në veri

Do ta menaxhojmë suksesshëm edhe incidentin e izoluar që ka ndodhur në tri qendrat e votimit në veri të Mitrovicës, ka thënë sot kryeministri i Kosovës, Hashim Thaçi, duke e cilësuar gjithë procesin zgjedhor për pushtetin lokal në Kosovë si legjitimim të marrëveshjes së arritur me Serbinë në Bruksel më 19 prill të këtij viti.

Këtë deklaratë kryeministri Thaçi e ka dhënë në Bruksel, në fillim të takimit bilateral me përfaqësuesen e lartë të Bashkimit Evropian Catherine Ashton, e cila paraprakisht është takuar sot me kryeministrin serb, Ivica Dacic, raporton RTK.

Kryeministri Thaçi ka thënë se sot në Bruksel do të bisedohet edhe për zbatimin të marrëveshjeve të arritura, veçanërisht në fushën e drejtësisë dhe policisë, ku, siç tha ai, Serbia është vonuar.