Thaçi: Po vjen fitorja e radhës e PDK-së

Partia Demokratike e Kosovës ka mbyllur fushatën e saj parazgjedhore në Gjilan, duke iu bërë thirrje qytetarëve të kësaj komune që të votojnë edhe për një mandat kandidatin e kësaj partie, njëherësh edhe kryetar i komunës, Qemajl Mustafa.

Lideri i PDK-së, Hashim Thaçi, ka thënë se fitorja e radhës e PDK-së po vjen, pasi që kudo shihet dhe kuptohet mbështetja për PDK-në.

Ai përmendi hapjen e Universitetit Publik në këtë komunë, dhe premtoj hapje të Universitetit Publik edhe në Preshevë.

Thaçi ka përsëritur premtimin për rritjen e pagave, duke thënë, se premtimi sot, është vendim nesër.

Kurse, Qemajl Mustafa u ka uruar fitoren qytetarëve të Gjilanit, duke thënë se tubimi përmbyllës tregon vazhdimësinë e punës së bashku. Sipas tij, në Gjilan me vjet ka funksionuar mirë gjithçka, dhe se nuk ka kohë për të humbur për proceset e ardhshme.

“Te ne çdo gjë mirë ka funksionuar me vite të tëra, dhe po funksionon mirë, edhe sot. Të sigurt ndjehemi, mundemi edhe më shumë, edhe më mirë. Ne e kemi projektin e qartë, dhe kemi shumë punë për të bërë. Nuk kemi kohë për të humbur sepse rruga që do të bëjmë është e gjatë, e vështirë, por është edhe shumë interesante, sepse do të na bëjë triumfues të vërtetë”, ka thënë Mustafa.

Mustafa gjithashtu ka përmendur investimet e deritanishme dhe projektet për një mandat të ardhshëm. /KP