Udhëzuesi i ISIS-it për xhihadistët në Evropë: Bartni kryq në qafë

Militantët që po luftojnë në anën e të ashtuquajturit Shteti Islamik, kanë përpiluar një manual të frikshëm për militantët e mundshëm që jetojnë në Perëndim, raporton Independent.

Manuali i shkruar në gjuhën angleze, ka 58 faqe dhe mund të shkarkohet edhe në internet, kurse në të gjenden udhëzimet për luftëtarët e mundshëm të ISIS se si duhet të veprojnë që të mos bien në sy shërbimeve sekrete të vendeve perëndimore, derisa planifikojnë sulme të reja terroriste si ai që ndodhi në Paris në nëntor të vitit të kaluar, transmeton Telegrafi.

Ata këshillohen të mbajnë mjekra sa më të shkurta, të përdorin parfume që i përdorin “perëndimorët”, dhe të sillen sikur janë të krishterë duke bartur rreth qafës zinxhir të artë me kryq.

Manuali i titulluar “udhëzuesi i sigurisë për ujqit e vetmuar muxhahedinë”, nuk shpjegon vetëm metodat e shmangies së shërbimeve sekrete perëndimore, por gjithashtu sugjeron objektiva të reja për t’i sulmuar.

“Nuk ka dyshim se sot në kohën e ujqve të vetmuar, vëllezërit në Perëndim duhet të dinë disa gjëra të rëndësishme në lidhje me sigurinë në mënyrë që të kryejnë me sukses operacionet”, shkruan në hyrje të manualit.

“Besojmë se vëllezërit tanë që nuk e flasin gjuhën arabe, do ti konsiderojnë tejet interesante këto këshilla të cilat do t’iu ndihmojnë në operacionet e tyre të bekuara”, thuhet ndër tjera në manual.

Ekstremistët këshillohen të sulmojnë edhe nëpër klube të ndryshme të natës, ku zëri i lartë i muzikës dhe mungesa e daljeve emergjente do të krijonin panik shtesë.