Vetëvendosje: “Edhe votuesit e PDK-së e LDK-së kundër zajednicës”

Lëvizja Vetëvendosje! thotë se qytetarë nga të gjitha subjektet politike, duke përfshirë edhe ata që kanë votuar për Partinë Demokratike të Kosovës (PDK) e Lidhjen Demokratike të Kosovës (LDK), po e nënshkruajnë peticionin kundër “zajednicës” dhe demarkacionit e kufirit me Malin e Zi.

Përmes një njoftimi, Lëvizja Vetëvendosje! ka njoftuar se deri tani janë grumbulluar më shumë se 160 mijë nënshkrime.

“Nëpër fshatra e qytete, qytetarë nga të gjitha subjektet politike, përfshirë edhe ata që kanë votuar subjektet që tash janë në pushtet, po nënshkruajnë masivisht peticionin kundër ‘zajednicës’ dhe demarkacionit me Malin e Zi”, thuhet në njoftimin e Vetëvendosjes!.

Vetëvendosje! ka thënë se peticioni do të vazhdojë deri sa të tubohen 200 mijë nënshkrime e pas saj pakënaqësia e popullatës do të shfaqet në protesta.