Viti 1999: Kadri Veseli i uron mirëseardhje Hashim Thaçit (Video)

Hashim Thaçi dhe Kadri Veseli ishin njohur me njëri-tjetrin shumë kohë më parë. Ata të dy ishin pjesë e celulave të para të Ushtrisë Çlirimtare të Kosovës.

I pari, Hashim Thaçi, vendosi që përpos pushkës të shërbejë edhe si shef i Drejtorisë Politikë të UÇK-së, e më pas u bë edhe bashkudhëheqës i delegacioni të Kosovës në konferencën e Rambujesë.

I dyti, Kadri Veseli, kreu punë në heshtje deri para pak vitesh, duke drejtuar ish Shërbimin Informativ të Kosovës. “Luli”, siç njihej në luftë Veseli, tashmë është kryetar i Kuvendit të Kosovës

Pas luftës, shumëkush e ka parë emisionin ekskluziv të Blendi Fevziut për ditët e para të çlirimit të Kosovës, si dhe të marrëveshjes së arritur ndërmjet KFOR-it dhe komandantëve të UÇK-së, në krye me kryeministrin e Qeverisë së Përkohshme të asaj kohe, Hashim Thaçi. Mirëpo, pakkush e ka njohur Kadri Veselin aso kohe.

Xhirimet e emisionit Opinion të Fevziut janë realizuar vetëm dy ditë pas hyrjes së forcave të NATO-s në Kosovë, në qershor të vitit 1999. Në një pjesë të emisionit shihet arritja e Thaçit nga Tetova në Kleçkë, me një helikopter të NATO-s. Posa zbret ai dhe të tjerët, i pari që i pret është Kadri Veseli.

Bashkë me Thaçin në udhëtimin e tij nga Tetova për në Kosovë ishte edhe Arbën Xhaferi.

Momentin kur Kadri Veseli i uron mirëseardhje Hashim Thaçit mund ta shikoni nga minuta e gjashtë.