VV: Policia që integron ish-kriminelët nuk mund të jetë në shërbim të drejtësisë

Subjekti politik opozitar, Lëvizja Vetëvendosje, po vlerëson se integrimi i “Mbrojtjes Civile” në Policinë e Kosovës i mundëson Listës Serbe të merr hisen e vet në shtetin, siç e quajnë ata, “të kapur të Kosovës bashkë me PDK-në e LDK-në”.
Vetëvendosje thotë se shteti i Kosovës është shndërruar në plaçkë, e cila po copëtohet e po ndahet midis partnerëve të koalicionit qeverisës.
Sipas tyre, nuk ka mbetur asnjë pjesë e buxhetit shtetëror, administratës dhe e sektorit publik e cila nuk po plaçkitet prej subjekteve qeverisëse, ndërkohë që shtresat e gjera popullore gjithnjë e më shumë varfërohen.
“Institucioni i fundit që po e dëshmon këtë logjikë të kapjes është Policia e Kosovës. Ky institucion që duhet të ishte në shërbim të publikes, është mbushur me militantë të partive, të cilët nuk hezitojnë të abuzojnë edhe me ligjin, për të zbatuar urdhrat e eprorëve të tyre. E së fundi, me integrimin e “Mbrojtjes Civile” në shtetin e Kosovës edhe Lista Serbe po e merr hisen e vet në shtetin e kapur të Kosovës, bashkë me PDK e LDK të cilët e ndanë shtetin porsi një plaçke të tyre nëpërmjet marrëveshjes për koalicion të 8 dhjetorit 2014”, thotë Vetëvendosje.
Lëvizja Vetëvendosje shfaq brengën se si mundet që Qeveria t’i integrojë këta pjesëtarë të “Mbrojtjes Civile” pa vërtetuar nëse kanë bërë ndonjë krim.
“Qeveri e “Zajednicës” nuk u shqetësua aspak për të vërtetuar se çfarë kanë bërë këta persona të sapopunësuar në Policinë e Kosovës para luftës, gjatë luftës e pas luftës. Këtë e themi duke e ditur se pjesëtarët e Mbrojtjes Civile i paguan e i kontrollon Beogradi”, thekson Vetëvendosje.
Subjekti politik opozitar, LVV, rithekson se dialogu në Bruksel nuk po i integron serbët në Kosovë, “por po integron Serbinë dhe strukturat e saj në shtetin gjithnjë e më të varur të Kosovës”.
E për më keq, sipas Vetëvendosjes, ky “integrim” i strukturave paralele të Serbisë në policinë e Kosovës, është edhe një skandal ekonomik.
“Në një vend si Kosova, ku papunësia është enorme dhe ku për një vend pune aplikojnë me qindra qytetarë, sot po pranohen pa konkurs paramilitarët serbë të“Mbrojtjes Civile”.Punësimi i tyre me rrogëqë del nga buxheti i Kosovës, pa konkurs e thjesht përmes marrëveshjes politike me Serbinë, është gjithsesi një krim ndaj të varfërve shqiptarë, boshnjakë, turq, romë, ashkalinj, egjiptas etj. pra, ndaj të gjithë atyre që s’janë serbë e nuk i shërbejnë Serbisë”, potencon Lëvizja Vetëvendosje.
Në fund, Vetëvendosje thotë se “kjo polici e cila integron ish-kriminelët e të gjitha llojeve, nuk mund të jetë në shërbim të drejtësisë”.