Zëvendësministri i Punëve të Jashtme të Kosovës takon përfaqësuesit e Kuintit për UNESCO-n

Zëvendësministri i Punëve të Jashtme të Kosovës, Petrit Selimi, ka pritur sot në takim pune ambasadorët dhe përfaqësuesit e shteteve të Kuintit në vazhdën e koordinimit të aktiviteteve në kuadër të procesit të anëtarësimit të Republikës së Kosovës në Organizatën e Kombeve të Bashkuara për Arsimin, Shkencën dhe Kulturën (UNESCO) dhe për proceset e tjera integruese.

Zëvendësministri Selimi falënderoi ambasadorët dhe përfaqësuesit e vendeve të Kuintit për mbështetjen e vazhdueshme dhënë Kosovës në procesin e anëtarësimit në UNESCO dhe në organizma të tjerë të rëndësishëm ndërkombëtarë dhe kërkoi vëmendje të shtuar ndaj gjuhës negative dhe pozicionit tejet negativ të Serbisë që rrezikon edhe vet procesin e normalizimit.

Selimi u zotua për vazhdimin e fushatës pozitive të Republikës së Kosovës, duke përfshirë angazhimin e të gjithë aktorëve relevantë në mesin e të cilëve edhe mediet, universitetet, institucionet shkencore e kulturore, shoqëria civile e kështu me radhë.

Zëvendësministri Selimi tha se pret që Bordi Ekzekutiv i UNESCO-s të votojë gjatë këtij muaji rezolutën për pranimin e Kosovës në UNESCO.

Në takimin në të cilin i pranishëm ishte edhe përfaqësuesi i Zyrës së BE-së për trashëgimi kulturore janë diskutuar edhe tema të tjera, përfshirë integrimet në komunitetin euro-atlantik dhe në organizata të tjera multilaterale.