Zhbogar: Zgjedhjet në veri të përsëriten

Përfaqësuesi i posaçëm dhe shefi i Zyrës së BE-së në Kosovë, Samuel Zhbogar ka vlerësuar se raundi i pare i zgjedhjeve lokale në Kosovë ishte i suksesshëm dhe ka paralajmëruar mundësinë që zgjedhjet të përsëriten në tri vendvotime në pjesën veriore të Mitrovicës ku, siç është shprehur, huliganët shkatërruan materialin zgjedhor.

Zhbogar konsideron se votimi ka kaluar me sukses edhe në komunat me shumicë serbe në pjesën veriore  të Kosovës, ku zgjedhjet janë zhvilluar për herë të parë nga shpallja pavarësisë së Kosovës. Ai ka deklaruar për TV slloven se në zgjedhjet lokale edhe në pjesën veriore të Kosovës pjesëmarrja e votuesve ka qenë e mirë.

Zgjedhjet lokale në gjithë territorin e Kosovës, që u mundësua  nga dialogu mes Beogradit  e Prishtinës, paraqesin “kthesë” në “procesin e pakthyeshëm” të integrimit të Kosovës dhe mënjanimi të strukturave paralele  gjyqësore dhe policore në veri dhe garantojnë një zhvillim pozitiv në rrugën evropiane të Serbisë dhe Kosovës, ka thënë Zhbogar.

Ai ka thënë se nuk pret ndonjë përkeqësim të rrethanave të sigurisë në Kosovë deri në mbajtjen e rrethit të dytë të zgjedhjeve lokale, por ka shtuar se është i mundur përshkallëzimi i tensioneve, prandaj do të jetë i nevojshëm shtimi i pranisë së forcave të EULEX-it  e të KFOR-it, transmeton agjencia kroate e lajmeve, Hina