Artistët serbë e vazhdojnë fushatën e politikës kundër Kosovës në UNESCO

Prizren, 11 mars – Tavolinat që kryesisht përdoren për gostitjen e pelegrinëve, që vizitojnë Manastirin e Kryeengjëjve afër Prizrenit, gjatë festave e ditëve të shënuara të kalendarit ortodoks, janë kthyer këto ditë në hapësira pune për artistë serbë nga Kosova e Serbia, shkruan sot Koha Ditore.
Nën tingujt e rock këngëve serbe këta krijues realizojnë punime grafike. Tema që pasqyrojnë në to është shkatërrimi i kishave dhe i manastireve dhe trashëgimisë monumentale. Era e ngjyrave është e fortë në atelienë e improvizuar, afër konakut të dikurshëm të Car Dushanit. Mirëpo as kjo nuk është pengesë që pjesëmarrësit e kolonisë të gjerbin kafenë gjatë pauzës.
Ka disa ditë që Manastiri i Kryeengjëjve është nikoqir i këtij grupi të artistëve, të cilët janë duke realizuar punime grafike që do të ekspozohen në një objekt fetar të këtij qyteti dhe në Graçanicë. Mirëpo katalogu i këtyre punimeve do të përcillet në të gjitha adresat diplomatike të shteteve anëtare të UNESCO-s.
Ndërkohë në një njoftim të Shtëpisë së Kulturës në Graçanicë bëhet e ditur se kolonia grafike që ka grumbulluar disa artistë serbë titullohet “Dhe si pas gjithë kësaj në UNESCO”. Sipas njoftimit ata për shtatë ditë do të krijojnë punime në Manastirin e Kryeengjëjve në Prizren mbi temën e kishave dhe manastireve të shkatërruara si dhe trashëgimisë monumentale, në saje të të cilave do të tërheqin vëmendjen “për rrezikun që i kanoset trashëgimisë së mbetur fetare në Kosovë dhe Metohi”, si dhe të bëjnë thirrje për mbrojtjen adekuate të tyre