Kamioni që barte foshnjën e pajetë ishte nga Vushtrria

Hysen Jashari, përgjegjës i deponisë së mbeturinave, ka thënë, në Ora e Fundit, se kamioni në të cilin ka qenë foshnja e pajetë, që u gjet nga punëtorët e deponisë, kishte ardhur nga Vushtrria, njofton Klan Kosova.

“Kamioni ka ardhur nga Vushtrria dhe ka marrë urdhër për të shkuar dhe zbrazur në deponi”.

“Kur ai është zbrazur, personat që e kryejnë këtë punë, kanë vërejtur një kovë në të cilën ka qenë foshnja”.

“Më pas është lajmëruar policia dhe shërbimet tjera, të cilët kanë kryer detyrat e veta”.

Këtë e ka konfirmuar edhe Skender Tahiraj, nga kompania Uniteti, i cili ka shtuar se kamionët nuk kontrollohen, por që foshnja është vërejtur teksa punëtorët po kryenin detyrat e tyre, raporton KlanKosova.

“Zakonisht nuk kontrollohen, por është fat i mirë që është vërejtur nga punëtorët”.

“Kamioni ka ardhur nga qendra e Vushtrrisë, por ende nuk dihet nga cila pikë bartëse”.

Edhe Jashari, si edhe Tahiraj kanë bërë apel që këto gjëra të mos përsëriten më. “Shpresoj që kjo të jetë hera e fundit dhe kurrë të mos ndodhin më gjëra të tilla”, ka thënë Jashari.

“Edhe nëse është i vdekur fëmija ai duhet varrosur e jo të hedhet në mbeturina”.

“Apeloj tek të gjithë qytetarët e Kosovës që të mos bëjnë kësi veprimesh”, përfundoi Tahiraj.