Vetëvendosje ultimatum Qeverisë: Të burgosurit, ose do të tensionohet situata!

Lëvizja Vetëvendosje përmes një njoftimi të lëshuar për medie kërkon nga Qeveria e drejtuar nga Isa Mustafa e Hashim Thaçi që t’i lirojnë menjëherë deputetët e arrestuar të opozitës, ose në të kundërtën, sipas tyre do të tensionohet edhe më shumë situata politike në vend, raporton Gazeta Blic. Sipas VV-së arrestimi i deputetit Pal Lekaj shpërfaqë edhe njëherë hipokrizinë e Qeverisë së Kosovës.

Kumtesa e plotë e VV-së:

Gjykatat e Mustafës dhe Thaçit vazhdojnë ta përndjekin opozitën

Sot, Qeveria Mustafa-Thaçi, arrestoi edhe një deputet të opozitës. Deputeti Pal Lekaj u dërgua para prokurorisë për shkak se ka kundërshtuar, së bashku me të gjithë deputetët e opozitës, “Zajednicën” dhe demarkacionin me Malin e Zi.

Ky rast, e shpërfaqë edhe njëherë hipokrizinë e Qeverisë së Kosovës. Ajo në njërën anë po do që të duket e hapur për dialog dhe qetësim të situatës ndërsa në anën tjetër nuk po e ndal represionin autoritar ndaj opozitës.

Është shumë e rëndësishme për Kosovën, që kjo Qeveri sa më parë ta kuptojë që nuk do të ketë rrugë tjetër përveçse të tërhiqet nga marrëveshjet me Serbinë dhe demarkacioni me Malin e Zi si dhe t’i lirojë të gjithë të burgosurit politikë. Sa më shumë që vonon, aq më i madh do të jetë çmimi për Kosovën.

Deputetët dhe aktivistët e burgosur politikisht duhet të lirohen menjëherë. Në të kundërtën, situata do të përkeqësohet dhe tensionohet edhe më shumë.

7 dhjetor 2015

Lëvizja VETËVENDOSJE!